Mujhey dukh hae…

Mujhey dukh hae es baat ka kay main ‘abhi’ bhi khush hon   Kash mae buhut dukhi hoti aur phir apney dukh logon main bant’ti Mujhey samjh nahi aati k wo log apney dukhi , udas honay ka shor kion mchatey hain jo dosron ko dukh detay hoye ayk pal ko bhi na hichkachaye hon. Mujhy sab se ziada hunsee uss pe aati hae jo khud zalim ho aur apni muzlomiat ka rona rota ho. Sharam nahi aati aysey logon ko.

Mujhy dukh hae kay main khush hon. Kitna bara dukh diya hoa hae logon ko main ne khush reh kay . hahahaha

Mujhey dukh hae k mujhey abhi bhi mausam pyara lagta hae . Mujhey dukh hae kay main ne  ’step back’ krney ka maza mehsos nahi kiya hoa. Naa kabhi parents ko dhaal bnaia , naa kabhi kisi ko chorr k oncha urrney ki koshish ki aur naa kabhi es baat ko le k rishtey khatam kiye k pta nahi hum sath chal sakain bhi k nahi. Mujhey dukh hae kay kisi ‘behkay’ hoye lumhay mae main ne kisi aur ki zindgi mae dukhon ki bunyad nahi daali . Naa mae ne kabhi yeh samjha kay ‘itni’ c baat se kya farq parr jaye ga.

Mujhey dukh hae kay log mujhey toot’ta nahi dekh sakey.

Uff kitni bari zalim hon main